兒子頭暈失眠半年媽媽帶睇急症　急症室醫生揭學生壓力爆煲想自殺

學生自殺事件頻生，有香港土生土長的急症專科醫生在其Facebook專頁「急症室狂人Dr Kwong」以《頭暈學生哥》為題帖文，指一名媽媽帶十多歲的兒子看急症，期間媽媽搶著說出兒子的病徵，包括頭暈頭痛半年、失眠等，但眼見其兒子外表斯文正常，認為有可能是濫用急症室個案，之後靈機一觸叫阿媽離開，兒子才向醫生告白，透露自己讀書壓力大想自殺，成功游說他入院尋求協助。

Dr Kwong慨嘆，個案由「無聊頭暈case」變成「心理輔導」，身體異狀可能只因情緒問題而出現，Dr Kwong更是「身同感受」，因自己中學時有同樣感覺，能夠理解年青人對環境的無助，以及那種對自我價值的懷疑，最後寄語這名學生哥「You’re a good kid，要好好地活下去。」

全文如下：

《頭暈學生哥》

阿媽帶住個十幾歲仔來睇醫生。分流寫住次緊急：頭暈，頭痛，半年。

阿媽一開口，話個仔頭暈頭痛左半年，又成日唔想返學，又呢樣果樣。

望下個仔，外表斯文正常，心諗，頂，濫用急症室，你自己湊唔掂個仔，唔好嘥我時間....

阿媽繼續爭住講：「佢呀，成日又唔訓覺，又唔願食野，成日苦口苦面咁.......」諸如此類。

本來諗緊點樣打發佢地走，但越聽完唔對路。跟住我叫咗阿媽出去等。

「點呀你做咩唔開心，做咩唔想返學呀。」我問。

「返學壓力好大，唔知為乜，好辛苦。」

「咁你有冇朋友仔呀，唔想同佢地玩咩，打下波，打下機？」

「..........近呢幾個月，做咩都冇晒興趣，乜都唔想做。」

傾左一陣，遊了一個大花園後，我單刀直入：「咁你有冇諗過唔想做人，死咗就算？」

「有。有幾次差點想跳落去，但係我冇用，我驚。」

就係咁，一個無聊頭暈case變咗做心理輔導，最後佢都好乖肯入院尋求協助。

佢令我感受很深，原因係曾經中學時我也差點跳了落去。或許，我還能夠理解年青人對環境的無助，以及那種對自我價值的懷疑。

You’re a good kid，要好好地活下去。

文章轉載自「急症狂人 Dr Kwong」fb專頁

TOPick翻查資料，發現在2018/19學年（即去年8月至今年3月），已發生逾20宗學生自殺死亡事件，單在今年3月已有3宗個案，其中一宗是一名只有12歲的女學生在家中吊頸身亡，Dr Kwong的貼文，正好給家長們一點啟示，身體的異狀可能只因情緒問題而出現，家長們應好好了解孩子背後隱藏的種種問題。